કાલે સાંજે વરસાદે સરસ માહોલ જમાવ્યો હતો. હવામાં ખૂબ સુંદર તાજગી.. અને એક અનોખી ખુશનુમા અદા...
એવી ઠંડક કે જાણે આભાલામાંથી બરફનાં નાનાં નાનાં કરા પડી રહ્યા હોય અને ભોમકાને ભેળાં થવા ઉતાવળાં થઈને હવામાં પોતાની સુવાસ ફેલાવીને ઓગળી રહ્યાં નાં હોય!
વાદળો એવાં તો ઘેરાયેલાં ... સંધ્યા થઇ હોય અને એ સુંદર આકાશમાં કોઈએ ઘેરા રંગની પીંછીંથી જાણે શેરડા માર્યા હોય...એનો રંગ તો આપણી આંખો ધરાય નહિ એવો સરસ...અને જોઈ રહેવાનું જ મન થયા કરે...
અને ઉંચા મકાનના ધાબા પરથી જોતાં એવું રમણિય દ્રશ્ય સર્જાય... અહી કાલે ખેંચેલી તસ્વીર રજૂ કરું છું. એમાં ખાસ આભાર કૃણાલ સોનીનો..જેને મેઘધનુષની આ તસ્વીર ખૂબ સુંદર રીતે ખેંચીને આપણા બધાં માટે રજૂ કરી છે...
અને સાથે સાથે મારી એક નાનકડી રચના.. જે તમને ગમશે એવી આશા છે. :)
વરસાદની આ મોસમમાં...મેઘધનુષ દેખાયું છે,એના ડીલની ચારેકોર...જાણે રંગોની મિજબાની છે...
સૂકું આકાશ એને મન...કોરું એક પાનું છે,જેને દિલ ભરીને રંગવાની...મેઘરાજાએ ઠાની છે...
એમાં વળી સંધ્યાએ પણ...મસ્ત મહોલત આપી છે,સૂરજને પણ ઊંઘતા પહેલાં...એને ખૂબ માણી છે...
ગામ આખું જોઈ રહ્યુ... કૂદરતની કરામત છે,આવી આવી આવી... મેઘરાજાની સવારી છે...
